Crna Gora u Češkoj, u grupi sa domaćinom, Italijom, Slovenijom, Bugarskom i Bjelorusijom

Težak zadatak čeka odbojkaše Crne Gore na Evropskom prvenstvu – igraće u grupi B u Ostravi, gdje će im protivnici biti domaća selekcija Češke, te Italija (izabrao je domaćin), Slovenija (vicešampion Evrope), Bugarska i Bjelorusija! Tako je odlučeno žrijebom u finskom gradu Helsinkiju.

Na prošlom šampionatu Slovenija je u finalu poražena od Srbije, Italija je bila šesta, Bugarska jedanaesta, Češka trinaesta, dok je Bjelorusija bila 22. Crna Gora je takmičenje završila na 18. mjestu, a u posljednjem kolu savladala je svog narednog domaćina Češku rezultatom 3:2 i samo zbog jednog seta Česi su prošli u drugi krug, a ne mi.

Svaka pobjeda u ovako teškoj grupi biće veliki uspjeh, ali znajući selektora Veljka Bašića i njegove pulene, sigurno je da se naš tim neće uplašiti nijednog rivala. O tome govori i podatak da je na Evropskom prvenstvu 2019. Crna Gora uknjižila dva trijumfa, a samo jedan set dijelio nas je od plasmana u drugi krug.

U grupi A, sa kojom ukršta naša grupa, u Krakovu će igrati domaćin Poljska, te Belgija, Srbija, Ukrajina, Grčka i Portugal.

U grupi C u Tampereu igraće Finska, Rusija, Holandija, Turska, Španija i Sjeverna Makedonija.

U grupi D u Talinu su domaća Estonija, Letonija, Francuska, Njemačka, Slovačka i Hrvatska.

“Želio bih da zahvalim organizatorima, jer su pokazali spremnost da ugoste ovogodišnji EuroVolley. Ako se vratimo u 2019, uživali smo u zaista nevjerojatnom iskustvu prvog turnira koji je organizovan od strane četiri zemlje, ali želimo da odbojka nastavi da se razvija i  napreduje. Uvjeren sam da ćemo uz pomoć četiri nacionalne federacije i njihovih partnera i vlasti, kao i naših velikih sportista, učiniti da se događaji sa EP 2021. pamte u godinama koje dolaze”, kazao je predsjednik CEV-a Aleksandar Boričić.

Evropsko prvenstvo održava se od 1. do 19. septembra, a grupa B u kojoj je Crna Gora igra se u Ostravi od 3. do 9. septembra.

Utakmice osmine finala i četvrtfinala će se odigrati u poljskom Gdanjsku i Ostravi.

U osmini finala u Gdanjsku, 11. septembra će igrati (1) A 1 – C 4 i (4) C 2 – A 3, a 12. septembra (2) C 1 – A 4 i (3) A 2 – C 3.

Ostrava će 12. septembra biti domaćin mečeva (5) B 1 – D 4 i (8) D 2 – B 3, a 13. septembra utakmica (6) D 1 – B 4 i (7) B 2 – D 3.

U četvrtfinalu, 14. septembra u Gdanjsku igraće pobjednici utakmica osmine finala (1) 1 i 4, odnosno (2) 2 i 3.

U Ostravi će 15. septembra u četvrtfinalu igrati pobjednici mečeva osmine finala (3) 5 i 8, odnosno (4) 6 i 7.

Polufinalne utakmice, kao i meč za treće mjesto i finale odigraće se u Katovicama u Poljskoj.

U polufinalu, 18. septembra, igraće pobjednici četvrtfinalnih mečeva 1 i 4, odnosno 2 i 3.

Utakmice za medalje, finale i meč za treće mjesto, odigraće se 19. septembra.